美國唱片業協會（RIAA）早前公布嘅報告顯示，黑膠唱片喺2020 年頭6 個月音樂銷售額係 $2.321 億美金，而CD只係佔 $1.299 億美元，係近35年嚟黑膠唱片第一次超越咗CD銷量，可想而知，黑膠碟未來將會成為世界另一股復古浪潮。
正所謂「香港歌手不會死」，出名嘅外語黑膠碟固然多不勝數，不過歷世歷代都有好多香港歌手出過一啲非常有紀念價值嘅黑膠碟，就等Linko小編為大家盤點其中5隻身價過萬嘅粵語黑膠唱片 ，全部都係碩果僅存，絕無僅有，你屋企會唔會都收埋咗其中一隻？
No.5：陳慧嫻 《歸來吧》
市價HK＄18000 1992年 | 寶麗金 | 售價來源
《歸來吧》係陳慧嫻第八隻粵語專輯，喺1992年3月26號由寶麗金發行，係佢喺美國讀書時期嘅錄音作品，呢張專輯可以話相當成功，尤其因為當時陳慧嫻本人未能親身宣傳，但都獲得當時三白金銷量，裏面有多首流行一時的歌曲，包括《飄雪》、《紅茶館》、《歸來吧》、《月亮》等等，令原本宣布要海外升學而封咪兩年幾嘅陳慧嫻可以延續佢嘅歌唱事業。
No.4：陳百強 《痴心眼內藏》 - 彩色圖案碟 (簽名版)
市價HK＄18800 1987年 | EMI 環球 | 售價來源
「痴心眼內藏」黑膠轉輯係Danny陳百強1987年1月推出嘅賀歲大碟，全部都係Danny自己揀選最喜愛嘅歌曲，有自己創作嘅《夢囈》，同改編歌《冰封的心》。仲有「鑽石王老五」電視劇主題曲《痴心眼內藏》，同埋由黃霑先生作詞嘅《神奇係我同你》。而呢隻特別印製嘅精裝彩色圖案碟喺2月20號發行，Danny更加為聯合國兒童基金籌款，而捐出500張簽名版進行義賣，所以非常罕有。
No.3：張學友 《每天愛你多一些演唱會》 - (2XLP)
市價HK＄18800 1991年 | 寶麗金 | 售價來源
《每天愛你多一些演唱會》係張學友發行嘅第二張演唱會專輯，亦係佢嘅第一次巡迴演唱會，演出地點包括香港，中國、美國同加拿大。而呢隻碟係環球UNIVERSAL為咗回應廣大樂迷訴求，決定重推1991年寶麗金集團多款黑膠碟系列，所以係由頂級錄音室Abbey Road Studios重新取樣製版， 取自黑膠「黃金時期」嘅絕代佳品，而且係由日本製造，入面附有10x10吋簽名印刷品1張，非常有紀念價值。
No.2：Beyond 《樂與怒》
市價HK＄22000 1993年 | 華納唱片 | 售價來源
《樂與怒》係Beyond發行嘅第9張粵語專輯，亦係樂隊主音歌手黃家駒生前最後一隻參與嘅專輯。呢張係一張講究搖滾精神同實力嘅唱片，Beyond成員都對呢張專輯非常滿意，在錄音及編曲上都更加體現自由風格， 1993年本來係Beyond成立十週年嘅日子，佢地本身打算1993年底喺香港辦一場紀念成立十週年嘅大型演唱會，無諗到同年6月後黃家駒喺日本便意外身亡，專輯內有Beyond十年心路歷程嘅主打歌《海闊天空》，亦都成為黃家駒最具代表性嘅遺作，同時係好多本地社運嘅代表歌曲。
No.1：張國榮《明星》白版 (45rpm)
市價HK＄25000 1997年 | 新藝寶 | 售價來源
要講呢隻碟之前，要同大家講解咩係白版，白版即係電台試音版，亦即係專供畀電台等媒體做推廣宣傳用嘅版本，多數係以母盤作為音源，直接刻製成碟，省卻咗唔少中間步驟，所以電台試音碟往往有較出色嘅音響效果，亦都受市場追捧。而呢張《明星》白版黑膠係45轉單曲電台試音版，封面標有“©MAN CHI”字樣，MAN CHI係指香港文志唱片公司，成隻唱片得一隻歌，得一面有音頻數據，而另一面係空白，更突出對呢首歌嘅重視，相當珍貴。《明星》電台試音版由張國榮、梁榮駿共同監製，而家市面已經好難搵到，絕對係黑膠唱片中嘅稀有珍藏。
想聽黑膠碟,但係又唔知揀邊款黑膠機好？不妨先由啲低價位嘅黑膠機入門，如果有埋內置喇叭、藍牙功能、好睇嘅外型，咁就唔怕只係3分鐘熱度之後，部機就無用啦~