任天堂前晚凌晨公佈咗Switch遊戲「動物森友會」11月份嘅更新，算係有史以嚟最大型同最多新元素嘅免費更新，一眾玩家都覺得等咁耐係值得！今次11月更新分為免費部分同付費部份，作為忠粉嘅小編今次就同大家介紹下免費部分嘅17個驚喜更新啦！
目錄：
- 1.博物館新增咖啡廳
- 2. 新NPC航平帶你出發到神秘島嶼
- 3. 開放巴獵島樂
- 4. 耕種食材 ，開放煮食功能
- 5. 配合Joy con體感操作於廣場做體操
- 6. 新增2種拍照視覺
- 7. 新增9種柵欄
- 8. 房屋5大改變
- 9. 新增哩數家具；商店新增全新家具；室外儲物櫃及ATM
- 10. 新增11種髮型及11種表情動作
- 11. 掘+種植陶俑，DIY成發聲陶俑小物件
- 12. 制定島嶼條例
- 13.「我的設計」圖案可用於牆紙、地板和衣服
- 14. 手機新增生活支援App
- 15. KK新增12首歌曲；新增音樂盒聽歌
- 16. 增加興建斜坡和樓梯數量；新梯子DIY
- 17. 可探訪島民家/邀請島民到家參觀
1.博物館新增咖啡廳
咖啡廳終於出現啦！喺進入藝術館嘅左側會見到一個寫住24小時營業嘅牌，入去之後就會見到鴿子老闆！
玩家可以用200鈴錢坐低飲咖啡，有時更加會撞到其他島民歎緊咖啡～咖啡廳左上位置會見到一部Amiibo機，可以以amiibo卡邀請特定角色嚟食個tea～
2. 新NPC航平帶你出發到神秘島嶼
喺島嘅木板地碼頭會見到新NPC航平，只要俾1000哩數，你就可以坐佢部艇仔，聽住佢唱歌出發去神秘島嶼！
要注意呢到出發嘅島嶼係同機場出發（哩數旅行）去嘅島嶼唔同，有可能季節同時間同你原本嘅島唔同，你更會收集到全新嘅素材，至於啲素材可以用嚟DIY啲咩就要到玩個陣先知啦～
3.開放巴獵島
之前成日覺得巴獵島淨係可以影相真係嘥咗個島，宜家終於開放巴獵島啦！係巴獵島屋仔右手邊有條路可以進入廣場範圍，入到去會見到賣唔同物品嘅NPC，例如薛革、狐利、駱蘭，但前提係你係需要捐錢俾陶俑先幫到佢地開檔，咁就唔洗每個星期等佢地上自己個島到啦！
另一個重點係你會見返莉詠與健兆夫婦，佢地可以幫你改造玩家無辦法改造嘅家具，例如哩數家具～仲有三位新NPC出場：星薇幫你占卜；刀麗茹幫你剪髮；仲有鎮長Tortimer都再次登場！
4.耕種食材 ，開放煮食功能
煮食功能面世，以後廚房設備再唔係裝飾！
首先要喺ATM以哩數換取煮食DIY卡，你就會獲得唔同食譜，而你需要係島上準備幾塊田地去種植食材，主要食材有紅蘿蔔、番茄、小麥、甘蔗、薯仔等等。每一個煮好嘅食物可以補充5/10個體能值，以後唔洗再逐個逐個生果食～
5.配合Joy con體感操作於廣場做體操
今次真係要起身一新郁啦！服務處門口右邊會見到一部收音機，喺到可以召集所有島民一齊拉筋（姐係跳廣場舞囉～），你需要將自己嘅Joy Con拆落嚟，然後跟住島民一新郁手郁腳，即刻代入咗入個角色到～～
6.新增兩種拍照視覺
兩種拍照視覺包括手持相機模式同三腳架模式：手持相機模式就係由自己角色視覺去影，當靠近島民時佢地就知道你要影佢，俾表情你影㗎啦～
三腳架模式就係可以將角度set好，咁自己就可以走埋入鏡頭，唔洗再用上帝視覺影相～
7.新增9種柵欄
包括公園柵欄、磚塊柵欄、冰柵欄、鐵皮柵欄等等，仲可以改變柵欄顔色，成個島嘅設計又可以多元化又靚啲～
8.房屋五大改變
A. 新增四款房屋外觀
其中包括日式房屋，個人覺得超特別！可以整返個日式區域～
B. 擴充倉庫空間至5000
C. 添加房子天花版家具
D. 屋內可自由行走半格空間
E. 牆紙可於單面牆壁使用
9.新增哩數家具；商店新增全新家具；室外儲物櫃及ATM
大量哩數有用啦！新增嘅家具同哩數家具都好靚～
室外儲物櫃姐係屋企個倉庫，咁想拎野就唔洗再不斷出人屋企！而室外ATM喺買大頭菜個陣就可以大派用場啦～
10.新增11種髮型；11種表情動作
11.掘+種植陶俑，DIY成發聲陶俑小物件
相信齊化石嘅玩家對於掘地已經無哂興趣，但新更新將會有陶俑同陶俑碎片埋喺地下，而陶俑碎片需要再次埋下並淋出先會種植出陶俑，而最後可以造成發出唔同聲同旋律陶俑小物件，超得意～
12.制定島嶼條例
島嶼條例可以跟據自己喜好去set，例如島民作息時間，可決定島民是早睡早起，定係遲遲都唔訓教做夜貓子～
13.「我的設計」圖案可用於牆紙、地板和衣服
以往只可以用喺衫同改造物件嘅「我的設計」可以用於牆紙、地板同衣服，屋內風格又多咗！
14.手機新增生活支援App
主要給新玩家作為遊戲指南，例如唔知點先可以跳落水，開個App就教到你～
15.KK新增12首歌曲；新增音樂盒聽歌
16.增加興建斜坡和樓梯數量；新梯子DIY
斜坡和樓梯數量由最多八條增加到十條，而新梯子可以固定於懸崖邊，取代梯級和斜坡，上落更方便～
17.可探訪島民家/邀請島民到家參觀
