12星座送禮推介(下） ＄1000內輕鬆買齊生日＋紀念日禮物
揀禮物絕對係一門高深學問，就算消費券個$5000到手，以為就好鬆動，可以買定一大埋禮物，遲啲可以一次過送晒畀老婆／老公、男／女朋友、Daddy／Mama，不過正所謂「花了它，手邊經已沒儲蓄吧」，買得呢樣，又未必買到個樣，最驚就係對方唔鍾意份禮物。以下就等小編就唔同星座，用最抵嘅價錢，幫佢地物色心頭好。
天秤座（9月23日 至10月23日）
推介：藍牙喇叭
一向以左右逢源、平易近人見稱嘅天秤座，平日就最鍾意招待朋友，又或者約埋三五知己去玩戶外活動，而且仲係出名嘅氣氛帶動者，一個輕便攜帶而外型獨特兼且防水嘅藍牙喇叭就岩晒啦，一邊播歌帶動全場氣氛，一邊型絕全場。 藍牙喇叭。
天蠍座（10月24日 至11月21日）
推介：枱燈、螢幕掛燈
做事認真、唔馬虎，對人對事分明嘅天蠍座，有時都花唔少時間去深入了解一個對佢地重要嘅人（俗稱：stalk人），尤其夜晚嘅時候一味碌碌碌，好易壞眼，所以就需要一個書枱枱燈，或者螢幕掛燈，咁就可以隨時隨地都stalk住想stalk嘅對象。
人馬座（11月22日 至12月20日 ）
推介：尿袋、掛頸風扇
成日周圍去嘅人馬座，一定唔會甘於坐定定喺度，同企定定喺度，尤其喺假日都會一定要約朋友出街，所以要揀禮物俾佢地就好簡單，尿袋（手提充電器）、掛頸風扇呢類便攜產品就最適合不過，尿袋岩晒佢地去到邊都有得充電，而掛頸風扇就可以隨時消暑用。
摩羯座（12月21日 至1月20日）
推介：智慧數碼記事簿
一向被認為係工作狂嘅摩羯座，如果有任何工具或者配件可以幫佢地提升工作效率，佢地一定會好鍾意，而家坊間就有一啲可以連app就做到電子記錄嘅記事簿，適合一眾摩羯座嘅上班族使用，隨時隨地，都可以記錄同重溫工作備忘，做嘢自然事半功倍。
水瓶座（1月21日 至2月19日）
推介：智能拖板、智能燈泡
被稱為係外星人嘅水瓶座，一向被人感覺都係好特別，好有自己一套，同埋好享受自己嘅思考方式，所以要揀禮物畀水瓶係好高難度，小編就特登揀咗智能系列產品俾大家參考，智能拖板同智能燈泡都係新科技產物，同水瓶嘅前衛思想真係好夾。
雙魚座（ 2月20日 至3月20日）
推介：黑膠唱片機
十分著重浪漫情調嘅雙魚座，最想收到啲又有心思，又有復古情懷嘅禮物，最重要嘅係，可以俾佢地用嚟Post上Ig打卡用！特此要推介黑膠唱片機畀一眾雙魚仔女，行李喼嘅造型，再加上黑膠碟嘅懷舊感，絕對會成為魚仔魚女愛不釋手嘅禮物。